發覺最近多左人想短炒！

香港經濟轉差跡象明顯，大家開始難搵食，最近我發覺多左人想短炒賺錢。呢種心態唔特別，咁多年嚟我見過好多人都有呢種諗法，一撈野唔掂就想短炒，但下場通常係：愈窮愈見鬼！

我真係唔係好明，俗語話：「股票（當然包括埋其他投資市場）市場專收叻仔。」係收服！唔係收納，啫係你幾叻都好，喺呢個大染缸裏面你都只係魚毛，如果唔識見好即收（一定唔識），註定最終比大鱷食左。

咁如果你已經正職都難搵食，居然妄想喺投資市場撈一筆生活費，啫係你覺得自己突然叻左，仲叻過一向常態既自己，你……最近發生乜野事？食左D乜？

突然有呢種諗法既人，其實開始不務正業；投資，你只能兼下，不能當作自己的主業，如果你選擇咁，你既人生好快淪陷，淪落到失去自我，咪制！

曾經有舊生問我：「Alex ，有無可能一個星期短炒可賺10%？」我笑住回：「唔好亂諗野啦！一個星期實可以短炒賺10%架，但「每」星期唔可以嘛！你實會有個星期輸返曬兼嘔突，腳踏實地做野啦！」

我的Telegram 群組昨天早上有舊生替朋友問，佢話佢呢位朋友「唔想煩」，想搵隻貼價d既比特幣現貨ETF 嚟投資；我一聽就知咩回事（所以我當時即強烈地回應群組既立場），佢所謂既「唔想煩」，潛台詞係：「佢想短炒，而買比特幣現貨ETF 好似買美股咁，出入金容易，所以想搵隻貼價d的ETF 嚟炒。」真係盡在不言中。

但佢問錯Group ，我地呢個group ，無人識短炒；而且，比特幣根本好難短炒，通常係起勢上起勢落，無乜波幅。其實，成個環球投資市場喺當下後疫症時代係重新發展，漸上格局居多，無乜資產有足夠波幅短炒。

言猶在耳，下午又有舊生同我分享，話佢有朋友想佢教下點「睇圖」，哈……又係想短炒！我叫佢同佢嗰位朋友講：「咪浪費精神喺d垃圾技術分析度啦，簡簡單單買NVIDIA 咪仲實際！」

你正職撈唔掂，唔係去炒股既，咁唔係辦法，考慮下轉型，重新學習過技能，認真學習三年就可轉型，真既！無呃你！人地唱歌都可以去紥鐵，呢d咪叻仔咯！而家又可以借呢個務實形象喺演藝界東山再起，我欣賞！

再唔係，正所謂「女子無才便是德」，而男子無才便是duck！考慮下，尖東就嚟有返大富豪，要人！