當隱形眼鏡用家遇上老花

之前講左老花戴眼鏡的選擇，如果用隱形眼鏡，遇到老花，又可以點做呢。

最簡單直接，加一副老花眼鏡，睇近時用就清楚晒。但戴得隱形眼鏡，10個有9個人都唔鐘意戴眼鏡，仲要最唔鐘意戴老花眼鏡，所以隱形眼鏡用家通常都會拒絕呢個選項。

第二個方法，適合老花度數較淺時用，就係將隱形眼鏡雙眼的近視度數調低一點，25度或50度，方便睇近距離事物。當然，呢個方法最大唔好處，會令看遠的視力變差。而呢個方法有個變奏版，稱為monovision，就係將其中一隻眼，通常非主力眼的度數減少，而主力眼度數則不變。Monovision的好處，就係可以適應習慣後，可以看遠看近都清晰，但亦只可以適用於輕至中度老花人士，因為近視度數最多只可減少150度，而且monovision亦會影響距離感及立體感覺，因距離感及立體感建基於雙眼都有良好視力，如其中一隻眼視力較差，就未能產生立體視覺

第三個方法，就係漸進式隱形眼鏡。軟性漸進式隱形眼鏡同眼鏡設計唔同，因為隱形眼鏡在眼中移動不多，所以看遠及近的區域像眼鏡般，看遠部分在上方，看近部分在下方，而是視乎每間隱形眼鏡公司設計，隱形眼鏡的中央區域看近或看遠區域（大部分都係看近），此區域外圍則包圍著相反的視區，令用家可。漸進隱形眼鏡好處，可提供不俗的視力之餘亦不會影響立體感。但由於看東西時，遠同近的影像同時投射入眼中，會互相影響影像的對比度。打個譬喻，如果某人用眼鏡，視力係100分，漸進隱形眼鏡不論遠近的視力最多只可以去到85分，而老花度數越深，影響越大。所以漸進隱形眼鏡未必適合對視力需求較高的人士

雖然近年隱形眼鏡公司積極研發產品，滿足老花用家的需要，但暫時市場上暫時都未有完美的產品。如果隱形眼鏡用家遇上老花，最好都係同視光師好好溝通，讓他們提供一個最適合的方案。

Alex@Oscar

相關文章 :