用人生態度去揀股

因為我睇股票係從公司所做生意的實務入手，所以當我睇好某隻股票，是從「長遠」角度，短線該股票既價錢升定跌，我真唔識睇。

我只會視我睇好既股票，其股價回落為「好抵買」，跌乾跌淨我又入下儲下，乜野叫跌乾跌淨？咪佢跌到咁上下有個可觀既彈升，咪叫跌光跌淨咯。

五十歲前，我試過好多生意，有成功有失敗，亦慢慢理出自己的經營道理；五十歲後，沒有魄力做實業生意了，亦明白自己的命格，我愈打鑼打鼓做某種生意，失敗居多；反之，我靜靜低調做，反而可以好成功，當年做補習，最好賺是在02年前one-man band 日子，後來紅了，盤生意只係好睇唔好食。於今回顧，我仍懷念那段one-man band 既自在時光。

「善用兵者隱於沒」，這是因為應我命格所得出的生意之道。

爲何我努力學習科技，就是因它讓我可以「兵」在程式，而不在人；人好煩，充滿嫉妒，潛意識常不安好心，這人性劣根，我看得通透，亦不會信賴。

將自己所懂既生意之道付諸實行是小用，大用則見於選股，港股是政策市，要揣測中央的心思，我真不懂，難有看法，所以不敢拈手；美股和日股則較奉行市場法則，可應用我所累積的生意體驗作判斷，譬如我對META 的Zuckerberg，初攪元宇宙，連小成都未有，就大事宣傳和發佈，我就覺得這人假大空，不切實際，最後他們要淪落到炒人才可以令股價起死回生；最近又狂抄Twitter，令我認定Zuckerberg 在facebook 的成功，只是僥倖，識見與魄力其實好一般，故此我認為META 當下已是高位！

這些觀點，亦是從我過往生意實戰中如何看一個人的工作魄力中理出來的。

我就是用這種人生態度揀股。