為何當年有沙士價出現？(II)

廿年前沙士最令人深刻印象既，就係樓價低殘，嗰時你夠膽買入，必賺。呢個睇法，真係種入港人心田深深處；於是，四年前又嚟另一波沙士，樓價有調整，我發覺當時好多人有「類同昔日沙士」既心態，以為係入市良機。當時，我真係力勸好多人唔好買樓，有些人無買到，今天額手稱慶；有些人買了，此刻苦等「解禁」（免罰印花稅）日子的到來。

如果比較廿年前既沙士同四年前既沙士，客觀經濟條件真係南轅北轍。

首先，呢廿年既物業信貸資料庫、各種印花稅同銀行壓力測試，已經無左97時投資物業極度高槓桿情況，加上過去十年量寬，大把人手頭上銀根仲好鬆動、隨時standby 買樓，一旦有mood 同到價，就買！根本未去到聞買樓而色變既情況。

真係㗎，而家港人對買樓既情意結根本無變過，仲好熱情！把囗就話而家d樓點買得㗎，其實個心就想樓價跌到去佢有能力買嗰個水平，唔係咁留意樓市把鬼咩！我上既YouTube片，都係講樓市最受歡迎，你就知香港人對樓市根本無死過心！ 

另一個沙士有既經濟條件、而家仲未出現，但我相信好快會出現！就係高失業率，無工做，無「生錢」入，呢樣真係最致命既。

記得2002年，我同我朋友坐喺間酒樓食午飯，對面枱有四十歲有多既中年漢，臉泛愁容，沒精打彩咁獨自食梗野，我朋友細細聲跟我說：「佢係我以前做嗰間銀行既經理，聽講佢比嗰間銀行炒左出嚟。」

沙士時，百業蕭條，好多企業middle management 既人都被裁出嚟，當時真係人人自危，大家都驚無左份工，再無生錢入，咁點供樓？所以，好多人都唔敢買樓，平都唔敢買，首先顧掂生活先，嗰時無起錢上嚟就真係一蚊都無，咪話唔驚！

呢個嚴重失業境況，而家香港仲未出現。

所謂沙士價，唔應該用價錢𧗾量，始終廿年嚟有通脹，無可能返翻嗰時$3500一呎建築面積價，但如果客觀環境係：

1）好多資金已套牢在樓市，且負資產個案數目不斷上升，蝕讓又多；當下香港而家已經有呢個趨勢。

2）失業率高企，唔好睇數據（而家政府d統計資料…….)，而係睇現實行情，高唔高失業率你行出街feel 到既！當下香港未到呢個階段，但呢種日子，我認為都近啦。

如果以上兩個條件都實現，相信樓價已違其沙士水平不遠矣！