為何當年有沙士價出現？

十年前，我開趣味投資班，舊生問我樓價會去返零三年沙士價嗎？

我笑著說：「真係到沙士價，你就唔敢買。」

的而且確，沙士價有佢獨特的社會與經濟條件，而嗰一刻，大多數人根本無雅興亦無實力買樓；大佬，嗰時新樓細2房百五萬就有交易（嗰時唔興納米開放式單位），典型例子係大角咀港灣豪庭d細單位；大兩房就二百萬左右，荔枝角四小龍就係例子，咁既價放喺而家，你扑都扑去買啦！

所以，講到沙士價，唔係盼佢幾時嚟，係問：「點解咁既價嗰時d人唔去買？」

因為嗰時好多香港人已經輸掉了人生，幾乎連命都無，如果染上沙士。

買樓投資既人，由97年開始，愈買愈輸，輸足七年，加上嗰時極興高槓桿投資物業，同銀行財仔押上押，但樓價只跌不升，你揸十件貨，每件一年無10萬，一年都無一百萬（嗰時一百萬實質值較大），而且好快就全部負資產，真係輸到光輸到走佬。嗰時我有個舊生，老豆九七前炒樓極風光，零三年後，要佢呢個仔出生搵錢幫手還樓債。（都係已故經濟學家Gary Becker講得啱，投資子女才是最高回報的）。

嗰時，物業係極負面既資產，無人想要，而家根本仲未去到呢個意識，你根本唔明嗰時的市場心理狀態。

以當下社會對物業的認知和態度，有排都未去到沙士價，甚至去唔到！

你真係咪天真！坦白講，只要你呢一刻！呢一刻！呢一刻！我要講三次你先理解到，呢一刻（第四次）對樓價下跌有期望，希望跌到沙士價，你呢個諗法就已經無可能有沙士價！

如果出現沙士價，係你聽到「買樓」兩個字都即刻歇斯底里狂叫，爆發抑鬱症！你係唔想有樓纏身。

下午再談當時既另一情景。