樓價愈跌愈急，大有機會年底出現好多九千多蚊一呎既盤。

樓市已接近災難式既下跌，奇怪政府仲未出招竭止樓價墮勢，反而仲推地賣，仲係啓德地添！

首先，嗰d納米樓，即係無房或一房嗰隻，約2百多呎實用面積，已經陷入樓災；由恆基帶頭喺啓德Henley Park 開價怒劈二成五後，其他發展商也跟隨劈價，將軍澳海茵莊園最新價單顯示，四十五個開放式單位最高可獲27%樓價折扣，五個一房單位則最高可獲25%折扣，減幅真係好驚人！二手納米樓都劈價，入伙約5年的市區半新樓黃大仙鑽嶺，實用面積214平方呎，一房嚟既，以335萬元沽出，原業主8年前買入價約390萬，帳面貶值左13.6%！

如無意外，好多納米樓業主已經負資產，雖則自住大晒，無有怕，但見自己既資產值急跌，始終唔開心！

另一方面，新界樓好似屯門元朗呢d區份，樓價跌得勁急！新鴻基剛銷售既Novo Land ，均價已經13800，已經相當低，我原先估計屯門元朗樓價年底會到12000，點知近日元朗雍翠豪園有個單位，實用面積672方呎，三房套間隔，仲係高層添，竟然680萬元沽出，呎價10,119元，接近10000元，睇嚟12000元一呎都唔駛等年底，下一季就到！

市區樓方面，黃埔花園月頭先有個單位賣到16500一呎，但唔知係咪紅磡海逸豪園近兩個星期出現左個成交，只得16800一呎左右，黃埔花園既叫價即下跌，低見14000 蚊一呎，睇個勢頭，13000都不是夢！

個人認為，樓市已進入我所定義既熊市第二期中間階段，大幅減價個案出現，而且會愈嚟愈多！

第三期會係點，樓價下跌伴隨失業率攀升。