樓價下跌都有個結構，咪成日奢望佢一跌到底！

喺youtube 世界度，只要你出片係講樓市大跌，標題講到有咁慘得咁慘，業主有咁淒涼得咁淒涼，就會好多人睇同subscribe，我就試過一段短片有接近百個subscription。所以，你見到網上講樓市，就係跌！跌！跌！吹得就吹，鳩吹就好！

呢種完全由網民喜好主導的製作，根本就非常失實！一個市場的跌勢，如果係長期，就有結構，如果我地要客觀了解一個市場，而唔係滿足個人既開心，就必須要深入理解。

因為香港整個政治和經濟結構已改變，樓市不得不作相應的調整，方向係走近內地城市的樓市，特別係樓價水平；所以，長期嚟睇，港樓價必向下，我講既長期，係十年至廿年，當中梗會有好多小陽春同「膠著」狀態，尋日我段YouTube 短片就認為嚟緊有半年至一年的膠著狀態。

我係咁諗，唔通為左收視，又迫自己違心講樓價未來半年要跌到扑街咩！

新鴻基賣嗰個屯門盤Novo Land，話明半年內樓價跌會賠比你，發展商唔會死錯人既！可能佢地已經有「共識」，半年內唔減價，免得推冧樓市。

其實，我已經覺得發展商已打算慢慢去貨，唔劈價，諗住賣翻十年八年，至於投地，未來幾年佢地應該無興趣，一來等d單位走左先，二來再觀望香港的政經發展。

如果你認為港樓會出現一轉97-03的大調整，咁係會既，但要將個time span 拉長到廿年以上，咁你可能會問：「咁咪好似港股咁？由2018年恆指32600左右慢慢陰跌到而家！都未見起色！」

係！個人睇法，樓價既陰跌仲磨人，磨足你廿年！

而且就算跌到底，可能以後都唔會大升返！

港樓，以後平常心買嚟住就算啦！昔日香港可以因物業升值而致大富的日子，已經一去不復還。