未來十年日本之所以興旺，是因為環球的長期資金盡集該處。

我睇好未來十年既日本經濟，並唔係因為佢基本面好，如果同我中學時期那個日本比，佢而家嗰基本面一d都唔好，真係雲泥之別！所以，如果你同我探討應唔應該投資日本，而重心喺佢既實質面，咁我同你真唔啱channel ，係雞同鴨講。

日本實質面梗唔好，唔係咩野少子化呀，人口老化呀等問題，係佢地制度太僵硬，要變樣野十世先變到，唔應該變既就一廂情願係咁變，貪得意咁（下面條link 呢個發明真夠曬無聊），最典型例子就係Sony呢個品牌，我嗰代人其實對佢有一定的忠誠度，但產品愈出愈跟唔上時代節拍，特別手機，都唔知攪乜，成日好似當相機咁設計，咁我不如正正經經買部相機啦，所以，呢個品牌老早已經跌左落「other categories 」度。

咁點解我睇好未來十年既日本經濟呢？因為國際資金流向咯！真係唔係一定基本好先好既，都要有勢頭配合你，你無基本面，但有運勢，你一樣掂！我夠覺得我「基本面」好過馬雲咯，又唔見我做到好似馬雲咁出色！？人地有運勢嘛！

日本正正迎嚟運勢！

過去十多年，點解中國經濟咁好，好大原因係國際資金的進入，不斷有生錢入嘛！塘水滾塘魚，點做得大吖！但而家中美由互為合作演變到相互角力至白熱化階段，國際資金持續由內地撤出，咁d錢去邊？

新加坡？衝爆左啦，嗰度而家乜野都勁貴，始終呢個國家仔無乜生產，係金融城市，吸納唔到太多資金，熱錢還可以，長期資金放唔耐，呢d錢要搵實際生意做！

咁，日本作為生產大國，正正可以吸納呢d長期資金，日本始終仲有個好靚既生產同物流基建底子，科枝亦不落後，加上無資金的出入管制，作為長期資金的落戶處，是全球最佳既資金集結地；更何況外資一來，必定夾住最先進科技而嚟，咁又將日本既產業全線推高至另一個層次，唔旺有鬼！

一言以蔽之，我認為未來十年日本經濟可再成為火車頭，是因為國際長期資金盡集於該地。