攞牌做加密貨幣平台其實好難圍皮

香港積極推行web 3.0 ，6月份將實行有關加密貨幣的交易平台發牌制度，陸續會有企業獲得牌照而許可運作；我個人認為，若申請的公司只純開發這種產業而申請，必定蝕死！

呢d交易平台，收入最主要係佣金，老實講，呢種平台競爭非常激烈，搵到既收入，好難抵銷純只做加密貨幣交易所帶泥既龐大支出。實情係，申請牌照既雜費絕不少，起碼一定要買類近存款保險的產品，加上平台的維護費用，實體店的營運費用等等真係非常燒錢，d佣金收入點頂得住！

呢d加密貨幣交易平台一直有得攪，就係因為無呢筆申請牌照既雜費，而且因為無王管 ，不依各地的證券法，佢地就會陸續巧立名目泥圈錢，甚麽liquidity farming，甚麽shifting cultivation(呢個term我作既^^)，甚麽高息pooling ；總之，圈完錢就挪用呢d存款或走佬！FTX 咁大，如果正正經經搵到錢，就唔駛淪落到今日咁既地步。

你一間新簇簇既平台，上要滿足政府的法規（起初必定好嚴），下要應付d「儍客」或「西客」，你要開幾多隊teams？d皮費真係好拿脷！

所以，我一直都認為，咁樣要有得做，一定係「兼做」，譬如傳統銀行，一向已有人手，調撥過去做，「搭單做埋」，就有數圍，話曬唔係由零開始，同埋已跟開法規，駕輕就熟。而你眼見各大銀行都嘆慢板，好精！睇定d先，等d爛頭卒硬食完，佢地先出動。

特別是中資銀行，得天獨厚，如無意外，佢地係最受惠於Web 3.0。