搶人才的迷思 —- 點解經濟唔好仲要搶人才?

有舊生見我文章談到香港經濟未來幾年都不會好，我們要有心理準備過緊日子，他感到奇怪：那為何社會另一種聲音卻說勞力市場不夠人，要「搶人才」！

一直以來政府說要「搶人才」，我也不太明白這是甚麼一回事，其實企業肯出高人工，多多外來人才都願來，而這作法一向也有，要搶嗎？我高考補習那些年，也曾跟入境處申請一位韓國designer 來港工作，人工高福制好就請到了，那用搶？就算是當下人氣甚高的金智媛，如果何伯有能力出高價，就不用河馬的湯水了，改要女王的眼淚。

這是經濟學基本法則，亦有其現實意義，勞工短缺嗎？加人工咪得咯！

記得上世紀九零年代，香港商家也常嚷著香港請唔到人，但香港是市場經濟，人工一加，自有勞力來，但當時你會見人工長期沒有調升，但商家又不斷叫喊無人，點解呢？

因為佢地根本唔係唔夠人，無錯係唔夠香港人，但內地人已來港補充了空缺，何來唔夠人！根本唔使加人工都足夠人用！

現在根本就處於同一情況，服務業喺唔加人工下，請唔到咁多香港人，所以要「搶」內地勞力嚟補充。

唯一最大分別係：上世紀九零年代商家唔加人工而請到內地人，佢地係賺到笑既；而家係商家無能力再加人工，加就要結業，所以希望現有人工下請到人。呢個分別，真係天淵之別，對經濟有唔同含義。

至於其他行業，較高端既，好似金融人才，根本無人想要，大多都失業，要搶咩？科技人才呢？出高人工實有既！而呢個產業既企業，就最願意比高人工，所以不用搶！

我擔心既係，香港經濟再繼續深潛下去，我地要期望再「低」d人工………..「搶」人才。