投資如做產品銷售，要懂「補貨」。

如果你做產品買賣，而某隻貨又長賣長有，譬如某類日用品消耗性極快，顧客需常來幫襯，咁你就會好留意自己手上夠唔夠貨賣，唔夠就要補貨，有時都真要格外留神，船期、係咪過時過節、突發需求等等，唔到你唔上心；始終你補唔夠貨應唔到市，有生意做唔到，好肉赤！而且影響鋪號聲譽，d客嚟買親都無，無下無下嗰客都以後唔嚟，咁就濕滯。

當然，補貨補過龍，砸死d貨又係另一個問題。

所以，補貨係一種藝術，何時切入，切入量幾多，好考眼光同功力。

投資，我個人認為，都有呢個「補貨」概念。

一種資產具長遠增值潛力，當然並唔係意味佢無波幅，短期仍可大上大落，特別是加密貨幣。對我嚟講，當某資產短期升勢可觀，而我覺得盈利已不俗，且升勢亦似快盡，我就會放，實現下利潤。

但走了貨，我手上就無貨了，未來怎應市？所以我心態上，就要補貨，尋底對我不重要，價跌到一個水平，我認為可賣出個利潤，就開始補貨，唔係點做「生意」？到時「顧客」嚟光顧，我居然無貨賣，要拆招牌啦！

當然，這「處理」態度的大前題，要隻野有長遠實力。產品都有週期，無人再要我就唔補啦，傻既咩！記得十多年前做日系時裝賣買，日牌ingni 某件冬褸大賣，我補貨補到暈，試過廿四小時內日本往返帶五十件回港賣（我只係喺日本逗留左三小時），但去到百五件後，去勢開始慢，我即減價清走晒d貨。補貨還補貨，都要睇實個買賣週期。

加密貨幣STX ，我在3.1 「賣」晒我2.1左右入既貨，我而家無呢個價既貨，好空虛！而佢又真回落，有人肯低價批貨，我當然願意入，乘低價補貨嘛！我打算，一穿2.0 我就急急補貨，無貨賣好慘架嘛！

生意難做，好花心力！