我點睇快上市既ARM

最近內地開始打壓官場既iPhone 使用，我認為對iPhone喺中國銷情不會太大影響，但即使係咁，嚟緊九月尾既新機，我相信由始至終都係無得炒；點都好，中央呢個政策有一定既標誌性。

標誌乜？標誌住蘋果產品喺內地已過其高峯階段，我今年已不斷為文說蘋果盛年已完，只會陸續回落，唯一博反彈的就係佢明年出既摺機，所以如果未來九個月蘋果股價跌得深，不妨入手，博它明年七月左右起既終極反彈，再喺九月炒埋部摺機，之後我地同蘋果既友誼，就應該告一段落咯。

其實，你宏觀成個科技發展週期，今回下游（即面向最終用家）已發揮得七七八八，由網站既普及，到可在行動裝置上廣泛應用，都有廿幾年，係一個週期的完結，呢段末期階段，除卻蘋果在使用手機方面創新係零（其實已經好多年無），其他品牌都開始乏善可陳，手機的開發已到盡頭。

而家係新一個科技週期，再由頭開始，方向是人工智能，所以發展始於上游嗰粒processing unit，為首受追棒既係開發GPU 既NVIDIA 同AMD，最近ARM 想上市，合乎客觀發展趨勢，呢間公司專注粒U 既電路程式開發同指令集既設計，實際生產則由買家自己去搵，好似蘋果就搵自己做開嗰間台積電；ARM 有一定價值既，但始終唔係自己做埋粒U，最先進的技術位呢間公司無，同NVIDIA 既潛力爭好遠；不過，未來日子ARM 股價一旦回落，唔怕入手，因為嚟緊三年當炒既美科技股喺上游！

中國最近終於出到自家既芯片，雖然係7mn，屬六七年前既製作技術，但始終係一個好開始；別忘記，中國在上世紀七零年代一窮二白，但廿多年後，就富甲一方；只要有足夠既養份，就可以追上來。