我睇唔通高通呢隻美股

舊生問我美股高通(QCOM)呢隻美股，我睇法係「中性」，最主要係我唔太明白佢既科技，仍在理解中。

高通近呢幾年都致力人工智能，但佢既人工智能唔駛GPU晶片，而係叫做終端側 AI，配合自家驍龍行動裝置處理器，就可以運行數據，由此，我地部手機就有足夠「智能」，可以學習周邊環境，掌握我地既生活習性，總之，手機與AI 混和一體，成為我們好知己！無錯，而家手機裏的個人語音助手就係佢既超級低B版。

但係，技術上，我有好多野唔明，終端側 AI 聲稱可以令你有高度私穩性，因為好多任務可以完全喺自己部手機進行，唔駛將個人信息上傳到雲端，咁意味住終端側 AI 會更好地保護用戶既個人數據。但我真理解唔到，咁d數據放左喺邊？喺手機度加密左？然後從遠端生成AI 再喺我部手機解密再應用？

高通最近同微軟的人工智能合作，我相信都係為左呢個終端側AI，始終AI 要由遠端生成。

因為唔上雲端，好多決策可以喺自己部手機進行，咁終端側 AI 大幅降低左數據經過更長的通路產生錯誤的機率。而且，終端側 AI 重可以喺無網絡或 Wi-Fi 連接既情況下完成任務。

再者，高通將語音檢測和識別從雲端遷移到終端機做，好多認證就可以實現即時回應，延誤極低。

不過，我真未太理解到終端側AI 係乜野一回事，所以我唔敢對高通呢隻美股妄下定論。

高通既對手係台股聯發科(2454.TW)，後者既「天璣」晶片市佔率喺近2年不斷攀升，美國所有出售既安卓機種中，已有五成係搭載聯發科晶片，高於高通的4 四成多，危機感下，高通已唔敢再找三星代工晶片（三星既晶片良率極低），轉而找跟聯發科同一間代工，即係台積電。聯發科亦有投入人工智能既研發，但方向不同，焦點在晶片設計，藉AI尋求最佳化既電路區塊佈局，從而提升晶片效能和減少功耗。從同業競爭角度看，聯發科對高通有極大威脅。

仲有，高通就嚟推出4 納米製程製造既PC 處理器晶片 「Hamoa」 ，目標係想在桌面電腦以及手提電腦方面擊敗 Apple 5納米製程製造既M2 晶片，得唔得呢？高通說服到 d PC 品牌棄用 Intel 或AMD x86 晶片咩？咁又會唔會激嬲Apple 㗎？Apple 係佢大客戶嚟㗎bor！

高通呢隻野，我真睇唔通！