我唔係高情操到「知恩莫望報」，係怕你「恩將仇報」而已。

年青時，天真得很，是真心愛幫人，施比受更有福嘛，成就人自己內心是快樂富足的，我亦無期望所幫助的人作出回報，「施恩莫望報」嘛！

但在人世裏經歷得多，你就會明白，別天真人家會報答，真係人地唔「恩將仇報」已算萬幸。

曾經在高考Econ 補習時成就過兩位老師，我沒想過有回報，但人家反過來對你心有恨，或妒忌，或想磨滅呢段發跡歷史，誓要將你扯下來鞭屍！

第一位，二十多年前我帶他出身教英文，我一份約都無同佢簽，因為我無諗住要綁佢，我一直都同佢講：「紅左咪自己出去發展個人一片天囉！我唔阻年青人發達」；結果，二年後，他紅了，開始搵打手在網上狂鬧我，話我當佢搖錢樹，又話我乜又話我物，唉….. 大佬，我同佢無合約架，佢隨時可以走，真係咁你咪走咯！何必要咁樣，原來佢要「餂盡」先走；最後我怕左佢，佢太好是非，同佢分道揚鑣；佢出到去，仲不斷閙我，仲即開Econ 想頂死我（但我咁令仔，咁易頂死咩！）都係我老豆懂人性，我成就呢條友時，我老豆見到，有次同我講：「你要小心佢過橋抽板。」我不聽老人言，吃虧在眼前。

第二個，謙謙君子咁，但佢心嗰份嫉妒，好恐怖；佢就相反，佢無諗住出去搞，但就不斷喺公司有意無意搞破壞，阻止公司發展；原來有一種人，你成就佢，佢唔會感激，但反而對你更加妒忌，佢地會咁諗：「點解係你幫我，而唔係我幫你！」於是，我每次既發展，佢都會拉倒腳，特別人事方面（行一件事人不和無得做），挑撥離間，搞到我好煩，最後要發展的事半生不死，唯有放棄。你會問，點解你會知佢係咁為人呢？因為我對佢生疑後，設局睇下佢係咪真係咁做，佢果然如我所料，我推斷佢做既野佢真做曬出嚟，我同事都讚我神機妙算。

唉……神乜野機妙乜野算吖，只怪自己遇唔到d正常人，正常得架啦！即係幫助你你知恩放在心得架啦，唔好反過來害我我就好多謝。

所以，今日我學乖左，幫人我都唔想比人知係我幫，幫你都係我自私啫，想自己開心咋嘛，你唔駛埋嚟，大家敬而遠之就得。

好多野，大家心照不宣就已經好君子！

P.S. 我同事睇完呢篇野，叫我不如爆佢地d扑街野出泥啦！哈….. 唔駛咁激啦。