我只係識咁樣睇美股

有舊生問我，有無留意K 線和美股業績公佈？無！我從來無睇！

先講技術分析，甚麼M線又好，乜野頭肩頸膊痛又好，RSI 超買超賣又好，我除左三十幾年前大學讀investments 時要交sem break project 用過外，我就再無拈過呢d咁煩氣既野，真係睇幅圖心都煩埋，乜野投資雅興都比佢磨走曬；所以，我係唔識技術分析既，我唔敢評論佢有無用（大學交功課就有用），無用過當然唔敢亂講，但呢派既投資分析工具，我無興趣。

至於公司的業績，啫係睇會計數據啦！讀Econ 既人最憎Accounting，我係表表者，真係見到張balance shit 我就唔耐煩，又係！我除左三十幾年前大學一年級讀過外，就以後一眼都無望過Accounting，要我睇嗰d financial data 同 ratios ，我真係好快訓著。正因為咁，編程一去到backend ，要處理數據，我就學到唉唉聲，真係好悶。

呢個亦令我遲遲提唔起勁深入探討機器學習，一處理數據我就懷疑人生。

咁我用乜準則揀美股？

咪當盤生意咁睇有無得做咯！

我由細到大對實業生意好有興趣，亦試過好多瓣，呢方面，我真係經驗老到，一盤生意有無得做，我真係睇得出；所以，我認為ARM 前景麻麻，佢d指令集收得太平，但嗰頭話想收貴d，google就已經開發緊android 系銃整合喺開源既RISC-V 中央處理器架構上，咁佢有仲得撈既？！我極唔睇好；而NVIDIA 既AI 晶片技術暫時嚟講係超前其他同類型公司既，佢技術上有大大條護城河，如果唔係美國政府阻撓佢賣貨比中國，一早升穿500美金啦！就嚟習拜會，唔知有無突破性發展？但NVIDIA 股價似想爆升！

至於Joby ，我認為空中汽車可解決陸上交通擠塞問題，帶嚟龐大既經濟效益，近景就唔知啦，不過，甚有遠景。AMD 也在中央處理器方面不斷突破中，令對手Intel 相當頭痛。

我係用呢種角度分析股票既，從實業生意角度去睇。

當然，呢種揀股法，大前題係要個股票市場既公司，大部份都係用心做實業生意，而唔係靠乜野財技炒嚟炒去，又或望天打掛等國策打救。

所以，我暫時只懂睇美股，遲d可能會識睇埋日股。

我仲要多d見識。