愛錬你蛋蛋的agents 

因為一直也有舊生想我開嗰物業telegram 群組，所以我今日忍唔住開左，不開由自可，一開就不得了，大家非常踴躍發言。

其中一個討論話題，就係賣樓時放盤，d agents 經常「揸流攤」，懶理不理咁，其實佢地咁做好合理，而家樓市淡靜，係賣家市場，要成就交易，大前題就要業主肯減價，咁我係agent，一定先令業主心態弱左先，所以，業立放盤我會先放軟嚟做，餓下你先。一來等你知無乜客，挫一挫你銳氣；二來用時間睇下你急唔急放，你比我知你急放，你死啦，開始鍊你蛋蛋。

樓市旺時佢地就唔會咁做，因為驚比同行搶賣左你個單位，唔緊要，輪到錬買家蛋蛋。九七前嗰幾年，物業熱炒，d agent 可以串到問買家：「你可以比到幾多個佣我先？」好串！直情當個業主託售單位係自己既。

當下你放物業，嗰agent 做land search ，知道你2020年買既，佢就會忖度到你想移居，唔係點解要等三年，而家鬆綁嘛，咁你想好價賣出個單位都幾難。

物業，對我嚟講，好時有幾好都得，你可以突然因樓價暴升而多左好多個「百萬」；但衰時幾衰都得，蝕錢之餘，你同d agents 交手，過程會非帶勞氣！

求人好難，人生在世，可以既話盡量唔好有野要靠人，總係麻煩。

咁點先可以做到呢個境界，咪好似我咁，老到無慾無求，不滯於物，可以自己學到既就自己學埋（我連水電都識），咪最高境界咯！