小本生意請人極難

舊生見我說日常工作如此忙，為何不請人幫手？

難！難！難！

首先，香港而家人工極貴，動輒二萬以上，郁下都三萬，政府工、大企業職位（特別生意係同內地或全球掛鈎）就話頂得住啫，小本經營，尤其本土生意，咁容易搵到皮費咩！如果你留意香港本土既生意行情，係極差，而家薪酬指數仍升，失業率低，係因為大企業既生意主要不在香港，有就真難捱，我雖然已脫離本土生意，但經營都係要如履薄冰，必須要謹慎控制成本。

第二，好啦，你肯比錢請人，咁都要搵啱人，咁易搵咩！尤其係我呢d小本生意，個人特色強，唔大路，你搵個人返嚟，要花好多時間教佢；仲有，最初階段係佢實習期，即係我比part 生意佢靠飛；大佬，我而家做既係科技野，佢儍下儍下按錯掣，delete 曬佢嗰部份d野，我唔死！係，我知，我會按level 授權同有back up，但佢一做錯，我始終多左功夫，咁咪幫倒忙！計埋比人工，我買JPEX 隻代幣自殺好過！

第三，咁假設請既人幾叻，跟得幾好，咁又有咩問題呢？坦白講，一個人兩條心好正常，佢有返咁上下醒，就開始會諗野，出現異心，不如另起爐灶，尤其你係小本經營，極易duplicate， 咁點解我唔自己做？我經歷過大大小小既生意，呢種情況唔係特殊現象，係普遍過普遍，正常過正常，比你自己都會，無話對錯！人地無責任對你忠誠。

所以，以前我開補習社，有位補習老師做紅左要離巢，我覺得好合理，人望高飛嘛！唔通喺我間細野度踎過世咩！但到佢自己既伙記要走，又鬧人二五又鬧人反骨，我心諗：唔係有病嘛！人地出份糧 jar bor ，做乜好似已成為佢終生家奴咁，痴線！

正因為以上原因，我好厭請人，呢方面真係好講緣份，無得強求，機緣巧合下，自然磨合就是。

一盤生意做得大，你自己雄才偉略唔夠既，仲要知人善任；但有時，時也命也，終此一生，未必有人比你善任。

我信命，照鏡時，除了嘔，還照出天命不歸我。

亦有可能是自己性格使然，所以，還是乖乖自己做個自媒體，樂在其中算。