大戶正等待美聯儲議息紀錄來做勢

美聯儲今晚議息，我等左好耐，不過，我既焦點並唔係喺息口的變化，我關心既係大戶喺市場會「借」乜野「勢」做野？

事物係客觀既，但演繹可以非常主觀，有D情況可以任你點噏都得！

你買某樣野，首件喺街頭既實店買，隨後喺網上入手第二件，發現同一件產品，賣價竟低好多。你可以深深不忿，認為自己第一件買貴左；但你亦可以慶幸自己第二件買平左（題外話，呢種情況我通常好阿Q，會用第二種諗法和順返自己）。

我相信美聯儲今回不會加息，但亦不會減息，息口維持不變，咁跟住勢頭會點？好大程度睇議息後美聯儲成員既表態與取向。

如果佢地態度鮮明，譬如認為美國通脹仍需壓下去，不能掉以輕心，咁我既投資方向就清楚，只要比特幣再回落，到26000左右，我就會開始分段入手，因為大戶必定會借勢鋤落去！

但若聯儲局態度含含糊糊，咁我暫時會忍手，因為我唔知大戶會做乜勢頭，方向不明，我唔敢妄動。

我一向唔相信市場沒有被操控，主流想法均是大戶製造出來，一旦做起到個勢，就會食住上！先前以巴衝突，就做起左預期減息的勢頭，於是狂推比特幣價格上去，明顯佢地喺44000美元水平左右開始派貨。

但派派下會唔會推翻上去呢？就要睇美聯儲議息後既紀錄，如果無稜兩可，大戶可能又吹減息，出口術托住喺44000美元左右既水位，再慢慢派。

我地呢d超級細戶，有勢就跟，無勢就縮！