啓德成投資重災區都是市場Price-in 既錯!

唔係我懷舊，但我真覺以前的學制優於而家既DSE，至少，好多人都覺得，舊制中六中七所學既野，一世受用；最近群組有舊生問比特幣快要減半會對比特幣價格有影響嗎？我都覺奇怪，照理我既高考舊生學過我所教既capitalisation 呢個概念，都知唔會有影響，點解佢會咁問？於是問佢有上過我高考課嘛？佢話無，原來係咁。

我又係真老糊塗左既，直當群組內所有學生都係我高考學生，會有其他人嘛！係我唔啱！而家等我講解下，就用啓德呢個投資災區做例子。

先用個簡單例子先，如果有個樓盤，話明五年後一定有地鐵，樓價駛唔駛等五年後有地鐵先升呢？唔駛！因為已經有左呢個預期，大家會將五年後呢個價值喺而家個價度price in 埋，唔駛等到時先升，而家即升比你睇！呢個係市場運作既重要特性之一，唔會有exceptions！

所以，如果有個agent 同你講，呢個樓盤附近個地鐵站幾日後將通車啦，到時樓價會升，而家應該趁低價買，佢搵緊你笨柒！

啓德之所以成為投資既重災區，就係因為當初大家預期嗰處會成為九龍站2.0，係超豪盤集中地再加新進CBD ，繼IFC、ICC，應該再嚟個I乜C；所以，幾年前賣既樓，買家都price in 左呢個憧憬入樓價度，結果交易價係天價，30000蚊一呎！

但自從政府安插左臨時房屋入該區，加上成個發展氣候完全不似當初既預期，之前price in 左既價值開始無左，唔係恆基都唔會將新推出既Henley Park單位大幅減價兩成半啦！大佬！兩成半真唔係細幅度！係夢想爆煲既下場！

呢個市場price in 預期既特性，好多人都知，所以佢地賣任何野，首先要造個夢比買家先，等佢地有憧憬，跟佢地一齊發夢，咁先肯比高價嘛！

比特幣由Day 1 出現，已經講明往後供應點樣減半，大家一早就知，真係晨早都已price in 曬，無可能等到嗰日新供應減半，比特幣先嚟價升。

任何市場價格，會突變，一定係有d無預期到既野出現。