咁大貨尾都痴埋去買，買家真係好樂觀！

我其實唔明，而家d新盤，好似剛過去星期日賣嗰個啓德新盤咁，有千幾個單位，佢首浸（包括嚟緊既加推）點好賣都好，最多咪賣三百多個單位，咁仲有四份三未賣。嘩！咁大貨尾，日後減價機率非常高，一劈就以一成二成咁計，好恐怖，點解要咁急買呢？真係好急住？但樓花嚟gar bor ！

你到現樓買都唔遲！你驚到時現樓會加價？咁睇好後市？

邏輯應該係咁：嗰盤劈三成先走1/4單位，咁如果要「真一Q清袋」，啫係一次過賣晒千幾個單位，要劈幾多？保守估計都要由最高位劈五六成，咁而家劈三成，該仲有兩三成「攤」去未來劈，除非你有隻牛眼咁犀利，睇得到樓市快轉角；如果唔係，樓市繼續熊下去，嗰二至三成損失，定必實現！

就當時間會累積一定既區內購買力（其實都比其他區內新盤消耗左啦，尤其係啓德地段，仲有咁多新供應），咁劈成幾兩成你都傷！

你可能會問：「發展商推新盤會盡推所有單位架咩！？」

廿年前沙士時，d新盤發展商一推就係成個屋苑所有單位全推，千幾二千個一晚真係「一Q清袋」，全部賣晒，所以嗰時賣樓要賣到天光，我最有印象就係荔枝角四小龍，真係一晚就KO 晒。

同你都有眼見，屯門而家d盤賣貨尾，劈到呢！二房就劈三成，納米樓無人要劈四至五成都有，咁恐怖既劈價，如果我而家係新盤既第一浸買家，買完冷靜落嚟諗諗，都應該覺得自己太心急，太受當時售樓氣氛所影響，真係除非收樓前轉角為牛市一期；否則，我就搵唔到原因而家買。

而家大型新盤賣法已有規律，發展商先推二百個單位左右，會清到八至九成既，然後再加推百幾個，就大概清一半左右，跟住就要等明年再劈價先可以行一次呢個銷售小週期。

究竟發展商要行幾多次呢種劈價週期，先清晒所有貨尾呢？大家可思考下。