加密貨幣生態只容得擒七打八之人？

誠心說，我熱愛加密貨幣，認為這是一次極重要既環球金融體制之自我解放；也許，自己始終讀經濟學出身，對一切來自非中心化管轄的出色安排，有強烈好感，而中本聰的比特幣運作，令我眼前一亮，自此結下不解之緣；我這年來學習科技，也是因為期望能走近區塊錬一點。

然而，我揀的路，絕不是主流，我甚至極厭惡過往幾年甚麽Defi 發展，根本十居其九均是騙局！

你跟人說你想搞一些跟加密貨幣有關的生意，我可以同你講，通常有兩種反應：

1）是大部份人的反應，聽到你咁講，兩眼隨即發光，內心即刻湧現擒七打八既歪念，佢地無論面容與及跟你既談話，其潛台詞都係：「好bor， 係咪最終都係想呃人錢，正bor!」

甚至看看你是否老襯，乜都唔識，係就走嚟呃你，睇下過程中有無得氹你開大個羅網嚟比機會佢搵錢，又或你出頭發展做替死鬼，佢喺後面擇肥而噬！

呢d正扑街！不過，我真係見怪不怪了。

2）另一類，心較正，但思路其實都係相同，或受主流歪念所影響，認為加密貨幣只有Defi 既發展方向，但見各地政府監管愈趨嚴厲，認為無得做。

我真係好想講，呢個世界有好多人發展一個項目，無話一定要發達，一定要賺好多既錢，佢只係想有個合理既回報，令自己生活到就得；而同時喺項目中搵到自我價值，發展到自己既興趣；至於可唔可以發達，隨緣，不能強來，否則就好似林作咁！

呢度就有一個咁既人，都係姓林，都係潮州人，但比林作老多一個圈，佢深明，富貴由不得你決定，但若要努力掙點成就，上天是應許的，因為佢曾經喺補習產業，單打獨鬥打上嚟，打出一條不錯的前路，所以，佢深信，一分耕耘一分收穫！

喺加密貨幣生態裏面，不乏這種實幹的人，重視科技的開發，而唔係諗住推隻乜柒幣推個乜柒Defi 項目嚟呃錢，佢地腳踏實地，克勤克儉喺呢個範疇中默默耕耘。

我係想做呢種人！

真係無話搞加密貨幣就代表搵大錢，好多人諗多左！亦都無話搞加密貨幣生意好輕易，真係要用好多心力經年累月打造而成，絕對唔係狂花錢就成功。

我會部署出返ATM 機，只係時日問題，但我自求我路，我有我既發展理念，亦必然依各地法例而行，絕不走偏。

到時擒七打八之人，不用來獻計，因為講人生歷練，我比你多；講科技，今天我亦不是吳下阿蒙！

更何況，道不同不相為謀！你做生意想一朝騙得全世界，我無呢個咁狂既諗法；我做生意只係想喺呢個世界做d野，就算死嗰刻，無大成功，咪算咯！

腳踏實地經歷過就好！