別問我出處

既然憶高考補習往事，是那麽多舊生愛看，他們「惡」其名叫「食花生」（這些花生會否年期太遠，放了這麼久！）其實我知道的，這些經歷多少勾起他們的年少情懷，像回到從前般；何況香港面容已改，就更倍添追思。

XXXXXXXXXXXXXXX

有一種心態，直至今天我仍不明白。很多舊生和當時的同業也知道，有位英文老師是從我處走出來的，但這傢伙，自立門戶後，就好想要抹走呢段「黑歷史」般，既不願提及，亦不會承認，搞到我以為自己以前開左d乜野唔見得光的既生意，以為自己開左鴨店賣淫咁。

回想當時，我帶他出身，我無想過要綁佢，綁佢就簽約啦！我真係一份約都無同佢簽過，只係當時課堂有鬆動，佢英文亦有料（我想強調，呢個條件係必須既，唔係d咩特別野），咪開班咯，如果紅左，咪自己出去搞間大咯，我唔敢阻年青人發展。

記得佢當時喺我處教左兩年，未紅（佢係第三年透過打手喺網上miniforum 講野而紅上嚟既，自此之後，呢種宣傳手法就極普遍）；有次有間大店，搵左條友（二打六，唔係英皇Ken Chan 級數，好似係嗰間大店日校部既校長）泥同我傾，想我加盟，我當時梗無興趣，但我心想我呢位英文老師未必喺我處會大紅，怕躭誤佢前程，於是就同呢位「代表」講：「我加盟就無興趣，但我呢度有位英文老師，好得！佢一定會紅既，你地有無興趣，我同佢無約，我可以安排你地見面。」對方無興趣(應該咁講，係我面前呢位人兄級數唔知乜野叫做好野）；一年後，佢地知道走寶了。

如果舊生有留意，高考後段好多紅左既文科補習老師，都來自我處。

英雄莫問出處，到而家我都唔明，佢對呢段我同佢既歷史點解咁厭惡，我當然唔稀罕佢惦念；坦白講，佢普通人一個（而家凹晒，更加普通過普通)，佢提唔提我我無乜所謂，但我只係好奇有d人既品性，會咁奇怪！

當年，我睇住佢紅，睇住佢逐漸自我膨脹，愈泥愈不可一世，佢得志後佢講嗰句：「邊個得罪我都唔會有好下場」，嚇到我驚無好下場，仲唔即刻同佢分家遠離之咩，因為我知道，得罪人呢家野好主觀，係自定義。咁不知天高地厚既說話都講得出，你要死我唔通唔比你死！

分家後；佢仲不斷同我地交惡，真係無怨不曾有經歷。你唔識佢，同佢無過交往，仲好好地！

記得分家後，有次同位當時AS level 中文好紅既補習老師吃飯，他對我說：「我都同佢講過：你無需要咁樣對Alex。」