別再相信「加價」可以解決經濟問題！

個人認為，令香港經濟難以復甦的主要因素，是香港人，特別是商家，仍然相信「加價」是解決問題的方法。

這想法是過去香港經濟發展所育成的，特別是近十多年全球量寬，令香港商家可持續加價而不損銷售量，甚至反而愈加愈多人幫襯；久而久之，成為一種信念。

但問題是時代變了，昔日造就銷售量跟價格上升的條件已不復在，典型例子有的士牌照價格，這麼多年，但凡加的士車資，的士牌價例升；然而，今回不靈咯，加車資後，就連竭止牌價下跌趨勢也不能，最新牌價已跌穿300萬。

原因為何？因當下你的士收費提升，市民就真不搭囉，以前經濟增長強勁和沒有其他選擇，市民就唯有照搭的士，而家就嚟內地網的也來香港分一杯羹，你的士咪繼續加車資囉，睇下仲會唔會多D人搭。我反而認為，如果的士車資下降，牌價先會止跌回升。

食肆也是，以前愈加價，等入店內進食的人龍就愈長，現在呢？只要你食肆一加價，市民就計數，喺香港外出食少一餐等於在內地食三餐，或在日本吃兩餐，於是，在香港就求求其其，喺屋企食算，省下既錢一次過在長假到其他地方食鑊勁，以致香港食肆，一星期七天，都門庭冷落。

我一直也認為，香港食肆的「加一」作法好唔文明，又唔公道，內地無呢種作法(重可以免費加底)，日本都無，一咁比較，就更加唔想喺香港食。

我都唔明，發展商應該好英明，好懂審時度勢，但賣樓到呢一刻，仲奢望可高價走貨，以致星期日啓德海灣零交易，昨晚恆基盤得嗰零星十幾個交易。大佬！而家已經有5萬個新單位未賣出去，明年就六萬幾，再堅持高價，不趁早賣多d，到時要勁劈時，由高位劈成六成都得，唔係講笑，係真恐佈！

云云咁多發展商，就只有長實李嘉誠睇得通。

香港，真需要學懂減價，經濟才能好轉。