做生意可以唔偷雞！？

做生意，你依足法例，唔偷雞，唔好話做唔做得大，真係連生存落嚟都未必得。

就好似你做地鋪，法例上你當然唔可以擺野擺到出行人路，但你唔擺到出去，你真係唔夠做，唯有偷雞擺下。我細嗰時做茶樓樓面兼職（當時我真係好細，第一日開工得11歲），請我原因，係因為星期六日間酒樓會偷雞開埋街出面，我係其中一個負責睇住既細佬，枱數仲多個間舖裏面，所以發死嗰老闆；你可能會問，差人經過唔嘈既咩！……….我每日既其中duties ，就係去貴賓室serve d差人叔叔打牌時既茶水，分區警署最大粒我都serve 過（佢地好nice，試過有位叔叔在枱面上隨手抓了些亂錢就送過嚟講：「細路，比你做tips!」，………我抵打賞架，因為我記得曬所有叔叔鐘意飲乜食乜，唔駛佢地叫我已遞上），咁你話呢……. 哈哈哈……. 那些年…….. 

後來，呢位酒樓老闆走左去黃大仙某個商場開分店，商場無得偷雞，蝕到佢死，玩左一年即執左佢！

我地當年做高考補習，有邊個紅既補習老師唔偷雞課室超收學生架；結果，呢個成為當時同行之間互相攻擊的手段，向當時既教署舉報超收。但當時亦都有個怪現象，就是愈舉報，嗰位老師愈紅，我曾經有段時間教署日日嚟巡查，我當時真係好頭痛，因為同時間日日d學生蜂擁嚟報讀，無理由唔收，但唔知點accommodate！

我寫呢篇，係想指出，做生意唔走灰色地帶難發圍，所以，Binance 先可以咁大，鵬仔游走國與國之間既灰色地帶，正因為咁，Binance 幾年內就成為全球第一既加密貨幣交易所。

走灰色地帶，當然都係犯法，執法機關認真執法時一樣要捉要罰，但問題係點罰；我既經驗係：如果你偷雞無存心行騙，只係想盤生意行得順d，通常罰款，金額大小就真睇你游走呢d灰色地帶做到幾大，愈大梗係愈罰得你甘啦。

當然，你偷雞得嚟存心欺詐，監都有得你坐！

當下美國SEC 針對加密貨幣交易所，發展至今日，似乎可以咁樣定性：

FTX：偷雞得嚟存心欺詐

Binance : 偷雞得嚟無存心欺詐

Coinbase: 連偷雞都未必有

Coinbase 應該復元得最快。