你唔係而家買債券嘛！

近一段日子，你會發覺四週圍又有好多聲音，叫我地買債劵，原因係息口見頂！

你要輸錢真係唔比你輸咩！

我明，你會問：「乜唔係利息跌，債價就升咩！」係～～～書係咁讀，教科書係咁教！但大家出嚟碌左咁耐，都明讀書既野，超簡化左現實，你讀高中Econ 夠話債券好穩陣啦，比揸股票好，D企業點都要還返本金比你，咁現實係咪吖！咪儍啦！

如果你因為個salesperson 同你講個咁既邏輯你就走去買債券，你不如買盒蛋卷，咁將來你無咁谷氣。

真係發儍先而家走去買債券，三個原因：

1）市場一直一廂情願話息口快見頂，真係見頂先算啦，快要啫，啫係仲會升，咁債價仲會跌，我做乜咁心急而家買。

2）邊個話利率見完頂就即回落，你唔比息囗喺高位徘徊㗎？咁到時慢慢睇清楚先買，咪仲好！

3）呢個係最重要，亦係教科書無教既，近一個月，不斷聽到d企業左破產右又破產，本來我地以為呢種情況係內地內房企業既專利，點知連英國第二大城市伯明翰都話要破產，破產即係點？有債唔還咯，本金利息通通都唔還，咁蝕既就係債主，當中有d債可能已經打左包，成為別類債券買比普羅大眾（呢個係我喺上世紀八零年代尾期讀大學時的主要課題，叫「securitisation」，呢個概念影響真係深遠，導致廿年後爆發美國次按風暴），你敢唔敢買呢d債券？大家要記住，利息跌債價升係成立喺不違約既情況下，如果企業違約，甚麽利息本金也歸零！當年雷曼證劵就係咁。

呢段日子世界各地違約成風，一句「破產」就不承責了，你居然夠膽死去買債券，真係要睇清楚係乜野債！

當年金融海嘯有d債券係咁：裏面包含左七間公司的債券，有六間好有實力好似長實和黃咁，但有一間係垃圾公司；推銷呢d債券既人會咁講：「你睇，咁多有實力既公司，唔怕還唔到錢！」

但該債券有一條條款，就係：只要七間公司的債券其中之一有違約，該債券就要報銷，啫係你一蚊都攞唔返。

呢段時間，一定會有呢d債券湧現。

咁你又可能話：「咁我買美國國債咪無事咯！」

查實，sell 你買債券嗰位係咪好令好索？！