何藩 《人生舞臺》

相較於《香港追憶》既詩畫意象表達，《人生舞臺》則貼近寫實。雖然何藩出生係一個殷實家庭，但作為富家子弟既佢，卻選擇將注意力放係「升斗市民」身上。係佢10歲個年，日本佔領上海，父母咁岩係澳門到做生意，而被迫滯留當地，何藩亦因此被迫同家人暫時分離，當時既佢只好寄情於文學、電影同攝影，以解孤單之苦及逃避對戰爭既恐懼，可能亦因為咁，令何藩戰後同家人到香港定居後，會將目光投放係香港基層市民身上。

何藩眼中，每個（平凡）人都值得被記錄。係佢鏡頭世界入面，每個人都係焦點，各自努力生活係自己既人生舞臺上。深受托爾斯泰著既《安娜·卡列尼娜》、雨果既《悲慘世界》、意大利電影德西卡既《單車竊賊》等等，呢類刻劃小人物悲慘生活、努力奮鬥既電影、文學作品所感動，雖然，當時香港經濟處於快速增長既時期，人民既生活逐漸變得多姿多采，但佢既鏡頭並無對準當時上流社會，反而心繫蒼生，關心民生疾苦，對橫街窄巷既市井生活充滿興趣。

何藩之所以鐘意小人物故事，係出於一種對草根階層既悲憫，而呢種悲憫並非指同情，相反，更多既係一種感動，佢認為箇中精神就好似海明威曾經講過既一句說話：

‘你可以毀滅我，但不能打敗我’

呢種草根精神，讓何藩為之動容。就好似50、60年代有句民謠：‘鬼叫你窮啊，頂硬上啊’，香港人既呢種咬

緊牙關力爭上游，為生活奮鬥絕不言敗既決心，令何藩“觸景生情、有感而發”。儘管呢類紀實作品並冇受到當時攝影沙龍既青睞，但都無阻佢既熱枕，並將呢份情感融入作品之中。有別於當時大部分既寫實作品，照片人物並無刻意煽情，反而係通過鏡頭讓更多人知道，當時既香港人點樣為生活掙扎求存、拼搏奮鬥。

除此之外，《人生舞臺》呢四隻字，會令我產生一種何藩想將小市民置身於舞臺上，成為眾光燈下主角既一種想像。何藩用佢部相機，讓人知道：平凡既小人物，都值得擁有屬於自己既舞臺。作為電影迷既佢，擅長利用黑影（背光效果再結合煙霧與光線），去塑造出一種舞臺感或戲劇氛圍。何藩對影子情有獨鍾，佢認為黑色係一種偉大既顏色，既神秘且有力量感，所以何藩特別鐘意黑白相，係黑白光影之中，人人平等，相機平等地記錄一切；而且，黑白相亦可抽離現實七彩繽紛既世界，為觀眾保留一個想像既距離，從而賦予照片唔同既私人感受。

可以講，何藩既攝影作品，既係香港第一代既本土藝術，亦係一種珍貴既歷史影像資料。佢既相填補香港過渡為城市景貌既空白；同時，亦為香港打開左一扇窗，將香港呢個東方小漁村介紹比全世界，見證香港既轉變。據悉，當年有唔少遊客，被佢既黑白相吸引而黎到香港。儘管鏡頭下既香江風情大多已不復往昔，但我地仍可透過佢既相片，認識舊時既香港。可能因為自己都係華人，大家既語言、文化背景都係一樣，每次睇親佢既相，總能從中搵到一份熟悉既親切感，好似係到睇緊自己祖輩舊底既生活。

何藩既呢本《人生臺台》，係三部曲中，最貼近當時香港城市樣貌既一本。本書除左展出舊時香港最真實既時代風情，亦將市井小民為「生」與「活」既呢種香港精神，活靈活現咁勾勒出黎。佢以攝影呢種方式，歌頌一班寂寂無名，為香港繁榮背後貢獻良多既小人物，將佢地昔日白手興家、堅毅既造像，呈現係觀眾面前。正因為何藩對香港、對香港人有一份關懷，佢既作品係反映芸芸眾生既同時，亦具簡潔且意蘊十足既藝術性，或許，係佢記憶裡頭，艱苦奮鬥既故事，就好似碎片般散落係唔同既角落裡，而佢自己就係個D碎片既收集者，收集呢Ｄ將被遺忘但真實存在既故事。何藩既相片勉勵我地，未來總有冀盼，生活仍能係艱苦中開花，就好似本書既標題 —《人生舞臺》。

“在這些恢宏壯闊的敘事之中，我們似乎總是記住那些有名有姓的人物。可是，難道平凡的人生，便不值得被銘記嗎？”