何藩《香港‧往日情懷》

至於《香港‧往日情懷》係何藩既香港三部曲中最新派、最具創意、實驗性既一本。晚年，何藩因身體問題，已經無法好似後生個陣，係條街到四圍遊，邊走邊拍，靜待每一個「決定性瞬間」既時機。為左能夠繼續係攝影方面既創作，繼續享受，玩埋落去，佢學習Photoshop，借助現代科技進行二次創作。

何藩將以前係黑房工作同拍電影得黎既經驗，應用係攝影到，透過後製將成千張舊底片翻新。例如：將相片局部縮放、剪裁、蒙太奇化、雙重曝光等方法，將其拼湊組合，賦予照片全新既生命。

當然，另一個原因促進何藩將舊底片翻新，係一種自我突破。雖然何藩係攝影上已取得一定既成就，但佢唔希望被人感覺只係「獨沽一味」，所以何藩主張不斷嘗試、創作、實驗，搞搞新意思，無論係電影定抑或出書，出得續集就要為觀眾帶黎新野；況且，人對美醜、是非、好壞既標準會因時而變，之前覺得唔好既相，依家睇返可能會有新既諗法或意象，甚至，可以利用後製，令以前救唔返既相，起死回生：

以《Forget Me Not》為例，呢張係佢其中一張經典既二次創作。何藩受到詩句：“可憐無定河邊骨，猶是深閨夢裡人”既啟發，發現到呢兩張相之間，可以想像成一個淒美既愛情故事：一個（妙齡／新婚）少女悼念係戰爭中死去愛人，何藩透過後製，令兩張本來平平無奇既人像相同殘破既街景相起死回生，賦予舊作新生命，創造出一種全新既概念性意象。

雖然有人會批評何藩既二次創作，認為呢種新派手法係劍走偏鋒，但崇尚修正主義既佢對此不以為意。攝影本來就有好多種手法同風格，呢種造圖方法都唔係D咩新奇大發現，係外國更為常見，何藩認為即使未能到別人所未到，亦要到自己所未到，只要岩使就會用，唔會將自己局限於某一派系，作品有冇內涵先至最重要。事實上，攝影受制於好多因素，好難每次都能夠影到最完美既相，何藩認為對此進行後製，係一種捨短取長、去蕪存菁既過程，換個角度黎講，用現代科技補救從前認為不可救藥既缺點，亦無可厚非。 

何藩既二次創作，可以講係集各家之大成。借由早年係黑房工作，以及拍電影所得返黎既剪輯經驗，將佢曾過讀過詩詞歌賦、文學、音樂等藝術意境融入作品當中，所以其二次創作集寫實、畫意、新派藝術於一身，相片除左唯美同擁有詩意既氛圍外，仲潛藏左何藩既精神意志，比如：對生命既悲憫、體恤塵世間既苦楚等，成功塑造左一種虛實相生、象外有象既畫面意境。

或許，何藩係準備呢本書既時候，對香港既印象已不再停留於過往點滴，似係一種回憶，而呢份回憶有點模糊，亦有點酸澀，更多既係似是一場夢，一種享受沉淫於自己夢境既情懷。雖然，佢係因健康問題被迫以後製既方式，延續自己係攝影上既創作，創作動機亦源於自己內心既感觸，但令人感到意外既係，何藩晚年最懷念既，始終都係佢早期以最普通既方式所捕得既瞬間 —《日暮途遠》。人對同一事物既解讀，會因為閱歷既積累而不盡相同，依家所認識既都不再係原本所熟識，反而最簡單、最質樸既野最教人深刻。 

說到底，＂藝術除左感動之外，便什麼都不是＂。對何藩本人而言，至少係攝影方面，佢未曾妥協過，始終忠於自己，亦唯有自己有感於心，先能夠將箇中點滴傳達比觀眾，作品先有靈魂，先有分量，先能感動人心。我諗何藩既攝影作品，係名符其實既「相如其人」，照片入面個班香港，個個都不畏艱辛，奮鬥求存，其實都好似何藩係攝影上一路走來既心路歷程，迎難而上、不斷既嘗試、不斷既突破，有掙紮卻又充滿尊嚴。

「我始終保持著兒童般驚奇的目光，和敏感的心靈——在舊的世界中尋找新的影像，在現實的人生裡發掘超現實的意境⋯⋯」── 何藩