今時今日點解仲有人比成千萬買香港物業？

我見屯門有新樓賣，叫NOVO LAND，新鴻基盤，望過下d價單，折實平均價都要座底15000一平方呎，一個普普通通既四百呎單位都要600萬，過600呎要千萬。

可能我最搵錢的黃金期唔係近呢十年，係高考嗰十幾年，跟住我本身教書呢件產品週期就完左，所以無經歷過近十年全球量寬既「好市」，唔知係咪特別易搵錢，但我咁計，2003年SARS 一個二百萬單位，到2018年左右已經去到800萬，咁呢15年，同一個工種，人工應該升左4倍，有無呢？無你點供得起！

真心講，呢幾年樓價，郁下就千萬，我真係好佩服d人點解買得起，以我高考補習全盛期，算係搵到d錢，但面對而家既樓價，我都超級腳軟！但2018年或之前，全港物業均有價有市，啫係真係好多人買得起，我點會唔服！

好啦，而家咁多年青一代移居，買樓安家既數目少左好多，又內地人自顧不下，正放售緊佢地自己國內既物業，都無暇亦無心情落嚟香港買樓，咁剩返幾多人想買港樓呢？

更重要既係，你都比得起成千萬買個單位，你唔諗移居？寧願喺香港落地生根？大家都知，如果你喺香港有兩三個已full paid 既普通單位，賣左出去都夠你移居兼唔駛做，而你居然反其道而行，進一步喺香港增添不動產，仲要咁貴入手。係愛！你係真愛香港！

如果你話你喺香港搵到錢，有排唔走，所以咪買咯；比著我，錢會繼續搵，但租算啦，有剩儲埋，大佬！睇大勢，樓價仍要跌，跌完仲要橫行，又要捱高息，我租算啦！起碼將來要移居，唔駛比個物業綁住！

當你擁有一個地方既不動產，就連你，也不能輕易跨地走動。

NOVO LAND 首個租盤近日達成租約，呎租30元左右，租金回報率3釐都無，考慮埋樓價無上升空間，真係好蝕！

新鴻基呢個盤好似星期六開賣，我都好好奇佢既銷情！