亞洲長期短期資金格局已成形

後疫症這段日子，資金流向不似預期，大家諗住內地既資金會重回香港，不單只無，就連香港本身的資金也流出，直奔過去新加坡。

而家，有好多錢「泊」左喺新加坡，但畢竟新加坡只善於private banking services，在行處理短期流動的資金，長期而言，資金必定流向具實際生產價值的國家作長期投資；當然，我預期係日本。

於是，整個亞洲的資金格局已成形：短期資金在新加坡，長期資金在日本。

這跟過去廿年的情況不同：短期資金在香港，長期資金在內地；亦因這樣的過去，造就了大中華的經濟盛世二十年。

基本上，星加坡有股市等於無股市，非常淡靜，始終星加坡這國家太細，有形的生產規模有限，來來去去都係提供無形的資金處理服務，往後日孑應該有好多錢喺嗰度借出，然後走到日本做實際生意，甚至至long hold 日本的實業股票。

日本係生產大國，一旦吸起長期資金，可以好「猛烈」，特別係物業市場，而家已經見到，物業投資正由日本首都圈慢慢擴散出去；而佢股票市場中的實業股，亦將會大炒特炒。不過，日本如果想發展出一個好似昔日香港呢個金融城市或當下的新加坡，就難d啦，始終佢d金融法規太煩，除非作出根底裏的改革。

我地香港呢個城市唔同，過去廿年，背靠祖國呢個世界工廠，差不多全世界的生產值都聚於中國，做實質生意要借貸，超方便！商家就喺香港借，咁你話香港和內地經濟點會唔旺！樓價點會唔高！

今回呢種格局分別散佈喺兩個國家，資金出入的效率梗係無咁高，始終香港同內地同屬一個領土範圍，只差一條深圳河，但勢局已成，我們可以做的，就係了解後續資金流向的發展。

我認為，一旦美國加息週期正正式式完結，亞洲資金「第一爆」就會出現。