中資機構式的港府管治

多年泥聽朋友和舊生分享，中資機構既管理有佢既獨特模式，而今早在telegram 群組中也有相近的分享，相當精闢，我略作修改詞措，摘錄如下：

「做過中資，領導係唔會直接話俾你知你要做乜野，甚至要點做，因為好多野領導自己都唔識，未見過，唔係果一瓣，變咗下面真係識做嘢嘅人要不停「猜度」領導意思，不停諗領導想要乜嘢然後交功課俾領導，唔可以閒著，交完功課見到領導「冇反應」，咁即係自己應該估得啱，至少應該冇錯，咁呢樣野可以繼續做，再繼續估其他新野做，結果越估越多，領導亦繼續唔俾反應，就繼續發揮落去；其實中高層不乏好多叻人，但當領導無端端叫人做一啲明顯違反邏輯嘅事，叻人就算知道明知係錯，都會落力照做，而且做到超出領導要求，唔會理個結果幾壞，由得領導自己見到好大鑊時由領導自己叫停先會停。可能咁樣就可以解釋點解香港喺好多方面仲嚴厲過大陸，好多野內地自己都唔當一回事，但喺香港就好大件事，令人窒息。」

看到最近港府既行政措施，個人而言，真感到著實有點矯枉過正，無奈之餘，亦同時覺得在當下香港，不知該如何配合法制，生活有點力不從心，無所適從。

另一位舊生分享得透徹：

「認真.. 依家香港呢個城市紅線畫唔清唔楚，內地都起碼知咩野得咩野唔得；乜野有乜野冇；我地可以喺清晰既框框內發展想要既野，搵替代工具都安全過香港，香港呢邊真係隨時有損失，風險高好多。

其實好易想像到即使大陸就某方面政策鬆綁、開明返，香港政府都唔會敢行頭，必定會先確保自己冇事先跟，必定慢過所有城市，包括澳門。」

都說今天我的舊生，位位我也可以向他們拜師求教，見解精闢，一針見血。

我受教之餘，沒有任何補充。

P.S. 本文雖有引文，但行文責任只在我，我是責無旁貸的。