不要過度用「淺」景深

上一篇講光圈，咁今次就同大家淺談下同光圈好有密切關係既概念：景深。

我記得自己初接觸影相，見到「景深」呢個名詞，受自己畫畫影響，心諗：係咪「背景」好深，透視得較遠較深入。

原來景深嗰「景」，唔係指「背景」，我完全錯曬！

我地可以咁理解：圖像中一般黎講可分成兩個範圍：

1）被人眼接受（最）清晰可見既範圍；和

2）相對比較模糊虛化既範圍。

當中，肉眼清晰可見既範圍就係「景深」既範圍啦。

以上圖為例，對於清晰範圍比較寛既相，我地可以話呢張相有「較大或較深既景深」；相反，我地會用「較細或較淺既景深」嚟形容清晰範圍比較窄既相。

而影響景深既因素有三個，分別係

1）光圈；

2）焦距；

3）物距。

先講光圈，佢同景深之間呈反比關係，即係話：光圈越大，景深越小（淺）；光圈越小，景深越大（深）。

而焦距同景深之間亦都係呈反比關係：鏡頭焦距越長，景深越小（淺）；鏡頭焦距越短，景深越大（深）。

最後，物距同景深之關係則呈正比關係：離相機距離越長（遠），景深越大（深）；離相機距離越短（近），景深越小（淺）。

喺鏡頭既世界入面，如果你想突顯拍攝主體，運用淺景深確實係其中一種好使又好用既方法，再以上圖為例，淺景深可以瞬間突顯出主體部分，有助觀眾將視線引導至相片中最重要既部分；另一方面，亦可模糊虛化不必要既瑕疵，令構圖變得簡潔，但如果你嚟嚟去去都係用個幾味野，出到嚟Ｄ相就好易變得乏味，更重要既係直接扼殺左讓自己突破創意界限既機會。

事實上，攝影者有時會過度使用淺景深，甚至讓呢種工具變成你過度依賴的拐杖。

大家喺運用呢種技巧既同時，真先要認識一下唔同深淺程度既景深都有佢地獨有既用途及特性，「用得好」比「係咁用」更重要，攝影不僅在於漂亮既照片，由始至終重心都係從照片中窺探出攝影者自身獨有的素養。

Alex@Kerwin