過去三年,揀建築期付款的買家真係輸身家!

2024 年 6 月 17 日 | 千語德財

我一直也奇怪,過去幾年點解d人咁比得起錢買樓,原來!他們大多也是死膽一派,不知風險為何物而已,而且還佔市場大多數。

記得兩年前我開始在youtube 放片,每每談及樓市時,我的觀點很簡單,就是入「熊」,樓市要進入漫長的低迷期。那時,有些人同意;有些人則不同意,更要狠罵我,他們的理據是,只要一通關,內地人湧來買樓,樓市就牛過牛魔王,何來熊出沒!

原來,那時真有很多買家有這種想法!害得他們兩三年後的今天,要付出沉重的代價!

過去三年d新盤,有八成多買家都係揀建築期付款,揀得呢d plan ,雖則他們常將「自住」掛在嘴邊,但心裏壓根兒就想著日後的升值,自住只是plan B 或plan C 而已。

數係咁計:我揀建築期付款,先比半成或一成,睇兩至三年,由簽必買必賣合約起計,到我收樓,都差不多三年啦,要賣都唔駛比額外釐收費(嗰時點會知日後政府會取消),如果到時樓價升二至三成,「摸」出去又好,或先上會然後住返一排(此所謂買嚟自住),跟住善價而沽,就算比銀行罰息,都爽賺了!

又或自住得嚟,同時因應樓價上升將原該2按變回一按,享受低息供款,又是爽死。

只要往後樓價持續攀升,這想法實在太美好;而當時市場就真有這種共識,只要一通關,內地人就來搶買樓,樓價哪有不升!難怪2022年首半年,樓價又再處於歷史高位,因為買家均期望快通關囉!內地人來啦,又有得搶了!

2002-2003樓市低迷時,買家揀建築期付款並不多,原因當時樓價跌勢已成,已是市場共識,大多買家均擔心兩三年後樓價再下滑,若到時才上會銀行一旦估唔足價,就麻煩了,所以那時是八成買家都揀即供plan 和立即上會。

現在則相反,揀即供的買家連2成都無,好恐怖!未來半年,兩三年前開賣的樓盤大多要收樓囉,這班揀建築期付款的買家,要上會啦,面對估價不足,要額外抬錢,抬不起錢的,就要撻訂!以後還要承受發展商追差價,有佢地好受;抬得起錢的,上了會後,每天住在那單位,樓價就每天跌一些,一年就無1成!本已無三成價值的物業,再住多年多兩年,就足足無4成!賣又賣唔出,硬食負資產。

自住怕乜!講就口爽!真係咁樣自住,唔怕有鬼!