「追究責任」呢個用詞真係每日聽到怕

將軍澳日出康城第一期「首都」嗰個單位，真係愈演愈烈，而家該幢大廈多名業主憂慮事件影響樓宇安全和樓價（呢個係最關鍵），認為管理處有責任監管同巡查，業主正計劃向管理公司追究責任。

有無留意，而家成個香港，每日氣氛都好繃緊，戾氣好重，不時各政府頭頭或部門會出泥「交待」，但好多時似警告大眾多d，話比我地聽呢d會犯法，嗰d會犯法，呢幾日好凶險，嗰幾日好高危，大家咪亂嚟！警方會嚴正執法，會徹查到底。總之，甚麼也要追究到底。

上行下效，而家成個香港社會氣氛都係咁，郁下就話呢d犯法，嗰d又疏忽，要追究責任，我絕對唔係話犯左錯唔駛追究，要！只係氣氛唔駛去到咁凶狠，咁群起而攻。人誰無過亦無疏忽呢！如果唔係有心危害他人，不妨可以多少少互讓。

喺呢種氣候，好多人都費時拿屎上身，寧願無為，甚至「躺平」，用消極的「志氣」面對未來；甚麽生涯規劃、甚麽雄心壯志、甚麽創新意念，都唔敢䆁放出嚟，怕唔知會有咩反效果，又被追究。

記得九零年代王維基做生意有好多出位既廣告，創意十足，當時曾一度引起社會道德既批判，但只於此，結果呢d廣告都令王維基的電訊事業再上一層；我心諗，如果而家行翻相同既野，可能又要「猛烈地」被追究責任。

我而家教書，好多舊生重以為我好似以前咁率性；大佬！有國安法架，學生有無吸收你教既野我就唔知，但「抽秤」你有無說話抵觸國安法就鬼打都無咁精神，所以我而家都好明哲保身，好「錫」自己，教書點到即止，盡左要教既書責任就算，太有啓發性的說話，真係怕言多有失，惹禍上身，可免則免。

這城市的創新精神，不知何時，走失了！這城市曾經有過的祥和，亦不知那時，換上了尖酸刻薄的排斥與批鬥。

真盼望中央處理香港的調子，在不久的未來，會改變。在國安法下，其實真係無香港人再敢喺政治上放肆，大家只期求能過著安穩與和諧的生活而已。

同埋每日可以聽少d「追究到底」呢d用詞。