日出康城拆左主力牆嗰個單位給我既啓示

今時真係唔同往日。以前，香港法制比人既感覺係，除非你真係傷及人命，做左d傷天害理既事，如果唔係，有d野你「偷雞」不依法，揭出嚟，罰則都好輕，好多時都係罰錢警告了事；而家就唔同囉，配合互聯網的渲染，件事可以搞到好大，動輒就歸類為刑事，罰則又極重，隨時要坐監！政府施法真係好唔同。

就以申請銀行按揭貸款而言，之前有單地產代理向銀行申請按揭買樓，單位虛報為自己自住，實情係用嚟放租，結果被判三年監，充公百多萬；講真，呢種做法，喺過往香港既物業投資市場，係極其普遍，真唔係一個半個Case，通常你果時月月準時供款銀行就唔多理；但而家唔係啦，犯法就係犯法，必定秉公辦理，同你跟到尾，罰都罰到最狠！我相信，而家仲有人係咁做，我諗佢地已經度緊點走個單位。

呢幾日日出康城嗰個拆左主力牆單位，又係另一個例子，我都幾肯定，呢種情況絕不罕有，大家都係心諗，如果有事咪還原咯，最多咪罰錢，又未去到搞出人命！佢地勢估唔到，以現下的社會氣候，又要去到刑事呢個地步。

我地而家喺香港做升斗市民，真係心理壓力好大，你唔知自己做左d乜事，或外來既無妄之災，會為你帶嚟乜野既嚴重後果，身心都好有負擔。

結果，大家都抱住少做少錯，一動不如一靜，都係唔好咁有為啦，因為你真估唔到乜野行為會引發d乜野既失誤，構成嚴重罪行。

我有朋友打算明年移民，佢都怕未來一年唔知自己盤生意有乜野閃失，令自身觸犯左咩法例，最終躭誤左佢同家人成個移民部署，所以提早而家結業，呢年求其出去打份工過埋算。

我自細喜歡創業，亦不怕創業，原因係以前香港的法制，比我既感覺係「體諒」多過「抽秤」，但而家我覺得係相反，就算我回到過往既青春，喺當下的法制下，我寧願喺大企業或政府度打工穩打穩紥算，唔敢任性囉！

香港現下既法制文明，再難容富冒險精神的創業家。