耐心等待下半年 Bitcoin Ordinals 與 STX 瘋潮

兩個月前，開左個加密貨幣投資telegram  group，顧名思義，當然係講下加密貨幣既投資事宜；但內容不似預期，我地愈講愈遠，尋日仲講到術數，入左group 既人應該覺得好搵笨囉。

無辦法，投資有時，買乜野資產既timing並唔係你話事，唔係你想買就買，你有閒錢想買未必係時候買；你感情無寄託時又想買，資產亦未必比你寄託。如果你有留意，加密貨幣每年年中例淡，最少動靜，舊年都係呢個時候最靜，通常要踏入九月先嚟料。

正因𤔡投資timing 由不得你話事，咁我地喺呢個階段，就要「裝備」，有兩方面，第一：資金，咪出左糧唔覺唔覺又喺淘寳買左隻吹氣figure 翻嚟，迫自己留低d錢，等機會；第二，唔好懶，自己溫下書，硏究下各類加密貨幣既操作，唔好人云亦云，人買你又跟買。

硏究過程中，最緊要探討佢既應用價值，科技呢回事，潮流興時，某種科技用途會吹到天咁大；當然，被捧上天時，相關資產短期會雞犬皆升，但我地真要眼利，或心知肚明，知道某d科技題材只係炒一兩浸，跟住收皮。

好似元宇宙，曾經一時無兩，成為科技界既投資主題，炒呀炒，連新世界藝術家主席都去sandbox 買塊地，結果呢？當Zuckerberg 既小一巴黎鐵塔畫本出現後，泡沫爆破；而且，好多人搞元宇宙，譬如香港d大型商場，都無乜人理同玩， 大家就開始知道佢既實用價值不高。而家蘋果又泥搞VR 同AR設備，蠢到死，無Steve Jobs 幽靈既apple，又想回到上世紀八九十年代。

我地投資真要好小心d科技主題，爆時講到天咁大，就好似人工智能，呢半年講到飛天，又話Microsoft 呢次勁啦，完全可消滅Google，特別佢既搜尋器chrome ，要玩完啦！又結果呢？根據StatCounter的資料，加入左ChatGPT既微軟搜尋器Bing ，佢既整體市佔率喺4月反而跌左2.79%，而Google繼續以92.63%的市佔率佔據絕對主導地位。

如果你有留意d現象，大多人都係貪得意拎AI 泥玩下，真係未認真到或放心到用喺實際生產力嗰處。

至於加密貨幣市場，d科技潮流野更要小心，你睇舊年嗰浸NFT ，狗畫幅畫都炒得上，痴線！

而家焦點在Bitcoin Ordinals ，但都係NFT ，只係佢放喺去中心化條錬到，但關鍵係NFT 既實際用途，我地重未見到。

但下半年焦點一定喺Bitcoin呢方面，市場又一定吹到天咁大用途。

我地要心知肚明，咪玩下玩下，連自己都扼埋！