唔覺得蘋果呢隻股票仲有可為

兩月前我曾說過蘋果大勢已去，有些Apple 忠粉舊生不同意，說蘋果產品深入民心，無可取替，我絕對理解（最近我用JavaScript 同時寫Android 和IOS apps， 強烈感受到在效能方面Mac 機優於Intel 機），亦非常同意；但這跟它的未來發展無關，講將來，重點在產品突破。

蘋果過去十年何時有做過產品突破！佢只係用兩個手法守住增長。其一，運用長尾理論，做盡其他小眾市場，一個也不留給其他品牌，講手機，又SE、又mini、又pro 又pro max ；講iPad，又mini又air 又pro ，Mac 機又air 又pro，Tim Cook 認真趕盡殺絕同業的所有生存空間；當然，呢招在商言商係得既！所以十年前我開趣味投資班時都話要買Apple股票，無創意嘛！但搵錢！但時至今日，乜小眾市場都做到飽和啦！仲好飽添！

另一手法係抄同業，Apple 恃住顧客的忠誠度同軟件的順暢度（後者呢方面優勢其實已逐漸消失），往往等同業創新行到咁上下，攞曬經驗啦，佢先嚟料；咁而家，最後一根稻草可以抄既，就係摺機，據聞明年會出埋，跟住又想玩顏色玩十年！？同埋玩影月球？呢d叫產品突破！乜野都有週期，Steve Jobs 既幽靈都有，佢已經不在人世十三年了，影響力唔會永垂不朽既！蘋果無可能可以食老本食咁耐！

聽聞Apple 想專注AR 同VR 既產品，咁我可以講，呢種產品絕對唔係普羅大眾想要既產品，邊鬼個得閒成日帶住「舊」野係塊面度呀，開頭貪新鮮玩下就得，但要成為習性，好難！Facebook 搞元宇宙失敗就係例子啦！而家淪為要不斷炒人托股價！

至於Apple 又想搞電動車，不自量力！車同手機係截然唔同層次的商品，Apple 好難將手機既顧客忠誠度延伸到電動車上，真係兩種品味，我認為就算Steve Jobs 在生，也未必做電動車做得好。

反之，而家科技兩大主流：Web 3.0和人工智能，Apple 都好被動，好唔進取。人地都專業開發緊GPU 啦，搞到開曬巷，佢唔係仲搞緊粒CPU，再嚟M3、M4 ……M67呀嘛！重有，蘋果幾時肯搞Cloud services 呢？

綜合以上，我睇唔到蘋果喺未來十年可以有乜野產品突破。唔係話佢產品唔受歡迎，梗有市場既，但我地買美股，無乜息收架，要賺capital gains ，你公司產品無突破，何來股價翻幾翻！